‘Yan Najeriya fiye da 45,600 sun nemi aiki a NNPC

Shugaban kamfanin man fetur na ƙasa (NNPCL), Mele Kyari, ya bayyana cewa mutum 45,689 ne suka halarci jarrabawar neman aiki a kamfanin.

Babban jami’in hulɗa da jama’a na kamfanin, Mista Olufemi Soneye, ne ya bayyana haka cikin wata sanarwa da ya fitar.

A cewar sanarwar,yayin ziyararsa ga cibiyar Ansar-Ud-Deen da ke Maitama, Abuja, Kyari ya yi alkawarin tabbatar da cewa tsarin tantancewa zai kasance mai sauƙi, gaskiya, da adalci.

Ya bayyana cewa gwajin ƙwarewa ta hanyar kwamfuta don neman aiki a NNPCL ya fara a ranar Asabar a cibiyoyi daban-daban a faɗin ƙasar.

Kyari ya ƙara da cewa, a matsayin NNPCL na mai bai wa kowa dama, an yi tanadi na musamman don tabbatar da cewa masu buƙata na musamman za su iya rubuta gwajin ba tare da wata matsala ba.