Hukumar Kula da Hana Cin Zarafi da Safarar Mutane, NAPTIP reshen Kano, tare da hadin gwiwar Kungiyar Lafiyar Iyali, SFH, sun kara himma wajen yakar cin zarafi na jinsi (GBV) a jihar Kano
An gudanar da wannan taron horarwa a ranar Alhamis domin ƙarfafa gwiwar masu bayar da taimako na farko wajen kula da al’amuran cin zarafi na jinsi.
Abdullahi Babale, Kwamandan NAPTIP na yankin Kano, ya bayyana wasu daga cikin nasarorin da hukumar ta samu wajen yakar wannan matsala.
Ya bayyana cewa, yara 15, daga shekara 8 zuwa 13, sun samu kayan tallafi na musamman domin taimaka musu wajen murmurewa daga ƙalubalen da suka fuskanta.
Har ila yau, NAPTIP ta samu nasarar hukunta mutanen guda 10 da ake zargi da aikata laifukan cin zarafi bisa jinsi a cikin watanni biyu da suka gabata.
Babale ya jaddada muhimmancin haɗin gwiwa tsakanin al’umma wajen magance cin zarafin, inda ya kira ga mazauna unguwanni su bayar da rahoton duk wani lamari na cin zarafi cikin sauri domin a samu damar daukar matakin gaggawa na magance shi.
Rukayyah Mohammed, Mai Ba da Shawara a Harkokin Zamani da Canji a SFH, ta jaddada muhimmancin rawar da masu bayar da taimako na farko ke takawa wajen kare wadanda suka fada cikin cin zarafi na jinsi.
Ta bayyana cewa yana da muhimmanci a kiyaye sirrin wanda abin ya shafa domin kaucewa kallon wari da kuma tabbatar da cewa ana musu mu’amala cikin girmamawa a duk tsawon lokacin samun saukinsu.
Daily Post Hausa sun rawaito cewa wannan zaman ya faru ne a yayin da ake bikin kwanaki 16 na faɗakarwa aka cin zarafi na jinsi.
