Shugaba Bola Tinubu ya amince da yin tafiye-tafiye kyauta a jiragen ƙasa ga ƴan ƙasa.
Ƴan Najeriya za su ci gajiyar abin daga ranar 20 ga Disamba, 2024, zuwa 5 ga Janairu, 2025, a matsayin wani mataki na rage kuɗin sufuri yayin bikin kirsimeti da Sabuwar Shekara.
Ministan yaɗa labarai da wayar da kan nama’a, Mohammed Idris, ne ya sanar da wannan mataki yayin da yake ganawa da manema labarai na fadar shugaban kasa a taron majalisar zartarwa ta ƙarshe na shekarar.
Idris ya bayyana cewa wannan tsari yana da nufin rage wa talakawa nauyin kuɗin sufuri, musamman ga waɗanda suka fi buƙata.
An gabatar da irin wannan tsari bara, inda aka ba da damar tafiye-tafiye kyauta a jiragen ƙasa da kuma ragin kuɗin motoci da kashi 50 daga ranar 21 ga Disamba, 2023, zuwa 4 ga Janairu, 2024, wanda daga bisani aka tsawaita.
