AC Milan ta sallami kociyanta Paulo Fonseca a ranar Litinin, 30 ga Disamba, bayan wata shida kacal da ya shafe yana jagorantar kungiyar, inda ya kasa cika burin kungiyar na fafutukar lashe gasar Serie A.
Korarsa ta biyo bayan canjaras 1-1 da AS Roma, wanda ya kasance canjaras na shida a kakar bana, tare da barin kungiyar a matsayi na bakwai, maki takwas a baya da Lazio, wadanda suke rike da matsayi na karshe da ke kaiwa gasar zakarun Turai, da kuma maki 12 a baya da abokan hamayyarsu na birni, Inter Milan, wadanda suke cikin fafutukar lashe kofin.
Bayan korar, AC Milan ta fitar da sanarwa tana cewa: “AC Milan na sanar da cewa an sallami Paulo Fonseca daga mukaminsa na Kociyan Kungiyar Maza ta Farko. Kungiyar na mika godiya ga Paulo bisa kwarewar aikinsa tare da yi masa fatan alheri a makomarsa.”
Yayin da kungiyar ke neman sabon mai horarwa, rahotanni na nuni da cewa ana sa ran Sergio Conceicao zai karbi ragamar jagoranci. Conceicao, wanda ya samu nasara mai tarin yawa a shekaru bakwai da ya shafe a FC Porto, na iya dawo da burin Milan.
A karkashin Fonseca, kungiyar ta fuskanci kwan gaba kwan baya, wanda ya kara haifar da takun saka tsakaninsa da magoya baya. Haka kuma, dangantakarsa da manyan ‘yan wasa ta lalace, inda ya sha sukar kwazon su da Kuma jajircewarsu a cikin fili.
Misali, ya zargi tauraron dan kwallon Portugal Rafael Leao a bainar jama’a, tare da yanke shawarar barin fitaccen dan wasan Faransa Theo Hernandez a benci don bai wa dan wasa daga makarantar kungiyar dama, yayin wani buga wasa babu ci da Genoa a farkon watan nan.
Tashin hankali tsakanin magoya baya ya kara muni lokacin da suka nuna fushinsu a wani bikin cika shekaru 125 da kafuwar kungiyar a ranar 21 ga Disamba. Magoya bayan sun zargi shugabannin kungiyar, musamman dangane da rashin halartar dan wasan tarihi, Paolo Maldini, a bikin.
Hakan ya kai ga wasu magoya bayan sun yi kira ga masu zuba jari na RedBird daga Amurka su sayar da kungiyar, inda suka rika rera wakokin adawa da shugabancin nasa
