Hukumar kula da wasannin doki ta kasa (NEF) ta ziyarci jihar Kano domin gudanar da zakulo hazikan mahaya doki a jihar.
An gudanar da bikin bude wannan shiri a ranar Litinin a filin Polo na Usman Dantata da ke Kano.
Da yake jawabi a wajen taron, Shugaban NEF, Dokta Obiora Anthony, ya bayyana cewa an zabi Kano ne saboda ta shahara a fannin al’adun doki.
Dr Obiora yace “Kano ita ce cibiyar doki a Najeriya saboda tana da dadaddiyar al’adar doki tare da mutanen da ke da sha’awa da kwarewa sosai a wannan harka, don haka ba mu ga wani wuri da ya fi dacewa da wannan shiri ba kamar Kano.”
“Muna da goyon bayan Mai Martaba Sarkin Kano, Gwamnan Jihar da Kwamishinan Wasanni, da kuma al’umma baki daya.
“Manufarmu ita ce horar da matasanmu domin su goga da sauran kasashen waje saboda tuni muna tattaunawa da wasu kasashe da suke da niyyar daukar ‘yan Najeriya domin samun horo a wajensu.”
Yace a wannan karo, sun zabi mutane 83 daga sassa daban-daban na kasar nan, ciki har da ‘yan wasa, alkalai da masu horarwa.
Hakazalika, yace anan gaba, Najeriya za ta fara shiga gasar wasannin doki daban-daban, kuma wannan dama ce don gano baiwa, horar da su, da kuma shirya su domin wannan gasa.
