Tsohon mataimakin shugaban kasa, Atiku Abubakar, ya bayyana matukar alhini kan rasa rayuka sakamakon turmutsutsin da ya faru a Okija, Jihar Anambra, da Abuja, Babban Birnin Tarayya wajen karban tallafin abinci.
Wannan mummunan labari ya zo ne kwanaki kadan bayan wani turmutsutsin daya hallaka yara kusan 30 a Ibadan, Jihar Oyo.
A shafinsa na X, Atiku ya ce: “Cike da damuwa da tsananin bakin ciki na karbi labarin rasa rayuka a cunkoson da ya faru a Okija da Abuja, wanda ya yi sanadin mutuwar mutane da dama. Wannan mummunan al’amari ya sake faruwa ne kwanaki kadan bayan mun rasa kusan yara 30 a wani cunkoso a Ibadan.”
Atiku ya kara da cewa: “A madadin iyalina, ina mika ta’aziyya ta ga duk wadanda suka rasa ‘yan uwansu a wadannan mummunan al’amur. Addu’o’inmu suna tare da iyalan da suke cikin jimami, muna fatan Allah ya kara musu hakuri, sannan ya gafarta wa wadanda suka rasu.”
Ya kuma yi juyayin abin da ya faru ga cocin Katolika, musamman Cocin Katolika ta Holy Trinity da ke Maitama, Abuja. Ya ce: “Muna mika ta’aziyya ta musamman ga cocin Katolika da mutane da gwamnati na Jihar Anambra da FCT.”
Atiku ya ja hankalin masu shirya irin wadannan taruka su tabbatar da tsauraran matakan kare lafiya da rayuwar jama’a.
A cewar rahoton DAILY POST, mummunan hatsarin cunkoson ya faru ne a Holy Trinity Catholic Church, Maitama, inda mutane kusan 10 suka rasa rayukansu, yayin da aka kai wasu da dama asibiti don jinya.
A daya bangaren kuma, mutane fiye da 20 ne suka mutu a Okija, Jihar Anambra, yayin da ake rabon shinkafa ga al’ummar yankin. Wannan ya kara tsananta damuwa game da irin hatsarin da kan biyo bayan tarukan rabon kayan tallafi a Najeriya.
